Lajme nga Shqipëria

“Do bëjmë gjithçka për t’i dhënë fund krizës”, Basha pas takimit me Komisionerin për Zgjerim: Gjetëm dakordësi për dy objektiva madhore

“Ne jemi të vendosur t’i japim fund krizës politike dhe do bëjmë gjithçka”.

Kështu deklaroi kreu i Partisë Demokratike, Lulzim Basha, pas takimit me komisionerin për Zgjerim të BE-së, Olivér Várhelyi, me të cilin tha se ka diskutuar pikërisht mbi mundësitë e zgjidhjes së krizës së rëndë politike në Shqipëri.

Basha tha para mediave se komisioneri për Zgjerim e ka prezantuar me strategjinë e tij, të cilën ai dhe opozita e bashkuar e mbështesin plotësisht, dhe se kanë gjetur dakordësi për arritjen e dy objektivave madhore, që do çonin në zgjidhjen e krizës, zgjedhjet e lira e të ndershme dhe hapja e negociatave.

“Më prezantoi me strategjinë që do paraqes ai, strategji që unë dhe opozita e bashkuar e mbështesim plotësisht. Prezantuam dhe gjetëm dakordësi të plotë se zgjidhja e krizës së rëndë politike në Shqipëri, përmes zgjedhjeve të lira e të ndershme, dhe hapja e negociatave, janë dy objektiva madhore, në harmoni dhe përputhje të plotë me njëri-tjetrin.

Mirëprita ndihmën e BE, që mundësoi dialogun politik për Reformën Zgjedhore jashtë parlamentit ilegjitim, të dalë nga krimi i organizuar, si hap i parë për të çuar drejt zgjedhjeve të lira, ku të zgjedhin qytetarët. Pa ndodhur kjo, nuk do të ndodhë asgjë, që do të çojë vendin përpara”, tha Basha.

(BalkanWeb)

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb


Source link